Կոնքով անցնում են խոշոր արյունատար անոթներ ու նյարդեր։ Ներկոնքային օրգանները կողքերից և հետևից պաշտպանված են կոնքի ոսկրերով, իսկ առջևից՝ միայն որովայնի առաջային պատի մկաններով։ Կոնքի վնասվածքները կարող են ընդգրկել կոնքում գտնվող օրգանների վնասվածքները և կոնքոսկրերի կոտրվածքները։ Կոնքի վնասվածքները նույնպես լինում են բաց կամ փակ։

ՆՇԱՆՆԵՐԸ

Կոնքի վնասվածքների նշանները նման են որովայնի վնասվածքների նշաններին։ Կոնքի որոշ վնասվածքներ կարող են հանգեցնել ստորին վերջույթների զգայունության, շարժունակության կորստի, ներկոնքային օրգանների գործունեության խանգարման։ Դա ողնաշարի ստորին հատվածի նյարդերի վնասման նշանն է։ Կոնքի վնասվածքները կարող են ուղեկցվել ներկոնքային օրգանների վնասմամբ, որոնք դրսևորվում են միզակապությամբ, արյունամիզությամբ և այլն։ Կոնքի որոշ վնասվածքներ ուղեկցվում են արտաքին սեռական օրգանների վնասումով։ Այս շրջանի ցանկացած վնասվածք խիստ ցավոտ է և հաճախ հանգեցնում է շոկի։

ԱՌԱՋԻՆ ՕԳՆՈՒԹՅՈՒՆԸ

Կոնքի թե՛ բաց, թե՛ փակ վնասվածքների դեպքում ցուցաբերվող առաջին օգնությունը չի տարբերվում որովայնի համապատասխան վնասվածքների դեպքում ցուցաբերվող օգնությունից։ Արտաքին սեռական օրգանների վնասվածքների դեպքում ցուցաբերեք օգնություն ինչպես փափուկ հյուսվածքների վնասվածքների դեպքում, սակայն նախօրոք տուժածին բացատրեք ձեր անելիքը, որպեսզի շփոթմունքի մեջ չգցեք նրան և ինքներդ գործեք առանց շփոթվելու։ Կոնքի կոտրվածքները հատկապես վտանգավոր են և պահանջում են յուրահատուկ մոտեցում։

ԿՈՆՔԻ ԿՈՏՐՎԱԾՔՆԵՐ

Կոնքի կոտրվածքները դասվում են ոսկրամկանային համակարգի ծանր վնասվածքների շարքին։ Դրանք հաճախ ուղեկցվում են շոկով։

ՆՇԱՆՆԵՐԸ

• Տուժածի կոնքագոտին ակներև ձևափոխված է։
• Տուժածը կոնքի շրջանում խիստ ցավեր է զգում։
• Կոնքագոտու վնասվածքի շրջանում լինում են տարածուն ենթամաշկային արյունազեղումներ։
• Տուժածի ոտքերը լինում են զատած («գորտի դիրք»), կամ հակառակը՝ ծնկներն իրար սեղմած։ Վերջին դեպքում տուժածի ոտքերը միմյանցից հեռացնելու չնչին իսկ փորձը խիստ ցավ է պատճառում։

ԱՌԱՋԻՆ ՕԳՆՈՒԹՅՈՒՆԸ

• Անշարժացրեք կոնքագոտին և սահմանափակեք տուժածի շարժումները։
• Տուժածի ծնկների տակով եռանկյունաձև վիրակապեր կամ որևէ այլ լայն ամուր գործվածքի կտոր անցկացնելով՝ զգուշությամբ սահեցրեք նրա կոնքի տակ։
• Կոնքն ամրացրեք գոտևորող կապով, դրա համար օգտագործելով եռանկյունաձև վիրակապ կամ որևէ այլ լայն ամուր գործվածքի կտոր։
• Եթե տուժածի ոտքերը զատված են և ծալված կոնքազդրային և ծնկային հոդերում («գորտի դիրք»), այդ դիրքը կայուն պահելու համար զգուշորեն, աշխատելով չշարժել տուժածի ոտքերը, ծնկների տակ և դրանց միջև ծալված ծածկոցներ դրեք։ Եթե, հակառակը, տուժածի ծնկները սեղմված են իրար, առանց ոտքերի դիրքը փոխելու անշարժացրեք կոնքազդրային և ծնկային հոդերը՝ զգուշորեն ծնկների տակ ծալված ծածկոց դնելով։
• Կապեք ոտքերն իրար։
• Ոտնաթաթերը հենեք որևէ առարկայի այնպես, որ դրանք սրունքների հետ կազմեն ուղիղ անկյուն։
• Ահազանգեք շտապ օգնություն։
• Ձեռնարկեք շոկի զարգացումը կանխարգելող քայլեր։
• Վերահսկեք տուժածի վիճակը, գրանցեք տվյալները և ցուցաբերեք համապատասխան առաջին օգնություն։

Առաջին օգնության հիմունքներ (Ինչպես գործել արտակարգ իրաիճակներում)
ՀԱՅԿԱԿԱՆ ԿԱՐՄԻՐ ԽԱՉԻ ԸՆԿԵՐՈՒԹՅՈՒՆ
Տեղեկատվություն. med-practic.com