Հեպատիտ B-ն վիրուսային վարակ է, բնորոշվում է լյարդի ծանր բորբոքումով, և հիվանդության հիմնական նշանը հաճախ լինում է դեղնուկի առաջացումը։ Դեղնուկը մաշկի և լորձաթաղանթների դեղին գունավորումն է։ Հիվանդությունը հարուցող վիրուսը փոխանցվում է արյան միջոցով, այսինքն կանխարգելիչ միջոցառումների չպահպանման դեպքում։ Ցանկացած գործողություն, որը կապված է ներարկման, վիրաբուժական միջամտության, արյունահոսության և այլնի հետ, կարող է վարակման պատճառ դառնալ։ Մյուս հիմնական ուղին սեռականն է։ Վարակման վտանգն ու վտանգի խմբերը նույնն են, ինչ որ ՄԻԱՎ-ի համար։ Վիրուսը կարող է պարունակվել նաև թքի, մեզի, մայրական կաթի մեջ։ Եթե մայրը վարակված է, նա կարող է փոխանցել վարակը հղիության ընթացքում պտղին և ծննդաբերության ժամանակ՝ նորածնին։

ՆՇԱՆՆԵՐԸ

Հիվանդության գաղտնի շրջանը կարող է տևել 3-6 ամիս։ Առաջին նշանները տիպիկ չեն՝

• գլխացավ, հոգնածություն, ախորժակի անկում,
• մարմնի ջերմաստիճանի բարձրացում,
• անգինա,
• հոդացավեր,
• մաշկի ցանավորում։

Նշանների ի հայտ գալուց 1-2 շաբաթ հետո սկսվում է դեղնուկի շրջանը՝

• մաշկի, տեսանելի լորձաթաղանթների, մասնավորապես աչքի սպիտակուցային թաղանթի դեղնություն,
• մեզի զգալի մգացում, կղանքի անգունացում,
• ցավեր որովայնում, հատկապես աջ ենթակողում,
• սրտխառնոց, մարսողության խանգարումներ։

Հիվանդությունը ժամանակին չբուժելու դեպքում գրեթե միշտ մնում են մնացորդային լուրջ երևույթներ, ինչպիսիք են վարակակրությունը ողջ կյանքում, լյարդի քրոնիկական բորբոքումը, ցիռոզը, քաղցկեղը և այլն։

՛Հեպատիտ B-ի կանխարգելման քայլերը լրիվ նույնն են, ինչ-որ ՄԻԱՎ վարակի համար։

Տե'ս նաև "ՎԱՐԱԿԻՉ ՀԻՎԱՆԴՈՒԹՅՈՒՆՆԵՐ ԵՎ ՎԱՐԱԿԻ ԿԱՆԽԱՐԳԵԼՈՒՄ":

Առաջին օգնության հիմունքներ (Ինչպես գործել արտակարգ իրաիճակներում)
ՀԱՅԿԱԿԱՆ ԿԱՐՄԻՐ ԽԱՉԻ ԸՆԿԵՐՈՒԹՅՈՒՆ
Տեղեկատվություն. med-practic.com